Метадычныя рэкамендацыі
Якія цяжкасці ўзнікаюць у настаўнікаў пры выкладанні беларускай мовы ў 11 класе?
Вялікі аб'ём тэарэтычнага матэрыялу
Як арганізаваць эфектыўнае паўтарэнне вучэбнага матэрыялу і павысіць узровень яго засваення?
Вучні працуюць у розным тэмпе
Якім чынам стварыць умовы для пабудовы індывідуальнай адукацыйнай траекторыі вучня?
Толькі адзін урок на тыдзень
Калі развіваць кампетэнцыі?
Паважаныя калегі!
Згодна з вучэбнай праграмай, адной з асноўных задач навучання беларускай мове на ІІІ ступені агульнай сярэдняй адукацыі становіцца сістэматызацыя і паглыбленне ведаў пра мову і маўленне, заканамернасці і правілы функцыянавання моўных сродкаў у маўленні, нормы беларускай літаратурнай мовы, удасканаленне культуры вуснага і пісьмовага маўлення (моўная і маўленчая кампетэнцыі).
Для больш паспяховага выканання пастаўленай задачы мэтазгодна арганізаваць урок так, каб большая частка яго была прысвечана практычнаму засваенню асноўных норм беларускай мовы.
З гэтай мэтай аўтарам прапануюцца кароткія відэаролікі па раздзеле "Сінтаксіс і пунктуацыя", які вывучаецца ў 11 класе. Падчас іх прагляду (дома ці ў класе) вучні маюць магчымасць узнавіць у памяці вывучаны раней матэрыял, з дапамогай інтэрактыўных заданняў самастойна замацаваць яго і звярнуць увагу на складанасці, якія ўзніклі. У пачатку ўрока настаўнік адказвае на пытанні вучняў, а большая частка ўрока якраз і прысвячаецца практычнаму засваенню тэмы.
Сутнасць такога задання не зводзіцца толькі да паўтору раней вывучанага, а забяспечвае актывізацыю пазнавальнай дзейнасці і імкненне да атрымання практычнага вопыту.
Так можна арганізаваць і перакулены ўрок, на якім не даюцца гатовыя веды, а прымяняюцца для іх замацавання і паглыблення.
Несумненна, прапанаваны матэрыял будзе карысны вучням, якія не прысутнічалі на ўроку, якія рыхтуюцца да алімпіяды і ЦТ.
Аўтар будзе ўдзячны за парады, заўвагі, якія можна пакінуць на старонцы Уражанні наведвальнікаў.
